AN CRIATHRACH FAOI SHAMHAIN
d’Fheargal
Criathrach rua, criathrach buí
Criathrach Samhna, síorchriathrach sí.
Buí-rua an criathrach, buí-rua ruabhuí
Leathbhuí anois, leath-ruabhuí arís.
Lagbhuí an criathrach, lagbhuí lagrua,
Leathlagbhuí, leath-lag-ruabhuí.
Taosbhuí an criathrach seo
Gona chrann crom rua agus buí
Crann crom, criathrach lagthaosbhuí.
An criathrach seo is gruabhuí
Lá dorcha Samhna is aitealbhuí
Criathrach scothbhuí: is lag-scothbhuí a lí.
Donnbhuí an donnchriathrach seo
Donnfholt idir ghiolc agus chíb
Donn, tréandonn, bundonn, barrbhuí.
Teimhealrua dó fós, teimhealrua, pollrua,
É polldubh, fód-dubh, dubhrua, síordhubhbhuí.
An criathrach seo is céirseachdhonn
Is céirseachbhreac breacluachair ciarbhuí.
Criathrach crónmhongach, ruachrónmhongach
Sionnach criathraigh scuab-rua bolg-rua buí.
Criathrach spréach-aitinn seo, spréach-aiteann róbhuí,
Ealta mionéan ar a ghuaille – go gob-bhuí.
Is síor-rua an criathrach seo, crónrua, cíorbhuí
Criathrach cíor-rua, scothbhreac, buí.
Muirchriathrach seo, é feamainnbhuí,
Seanmhuirchriathrach rua agus buí.
© Diarmuid Johnson, 2021