File, ceoltóir, scríbhneoir agus scoláire é Diarmuid Johnson. I gCardiff na Breataine Bige a rugadh é in 1965. Cuireadh oideachas air i nGaillimh idir 1970 agus 1989. Tá céim B.A., M.A. agus Ph.D. sa Léann Ceilteach aige.

---

Éist le Diarmuid Johnson agus a dhán ‘An Criathrach faoi Shamhain’ á léamh aige (as bailiúchán nua atá á chur i dtoll a chéile aige….

---

Ó 1989 i leith tá blianta go leor caite aige ina léachtóir ollscoile in Éirinn, sa mBreatain Bhig, sa mBriotáin, sa nGearmáin agus sa bPolainn. Chaith sé cúig bliana le ceird na hiriseoireachta agus na heagarthóireachta i gConamara.

Filíocht Teallaigh agus Tuairisceoireacht Raidió

Tá leabhra go leor scríofa aige, agus tá a chuid fliúiteadóireachta le cloisteáíl ar cheirníní éagsúla. I 2014, bhí sé ina fhile teallaigh i dteach mór Rhos-y-Gilwen in iardheisceart na Breataine Bige. Bíonn sé ag tuairisceoireacht do Raidió na Gaeltachta. Múineann sé Gaeilge in Éirinn i rith an tsamhraidh. Is é Rún na mBradán an cnuasach filíochta is deireanaí ón údar.

Sraith na Teamhrach

Tá an tsraith Trí Scéal na Teamhrach curtha de anois aige, trí leabhar ‘Conaire Mór’ (úrscéal bunaithe ar sheanscéal Togail Bruidne Da Derga), Tuatha Dé Danann’ (bunaithe ar ghabháltas Thuatha Dé Danann ar Éirinn), agus ‘Éadaoin’ (scéal mór grá na nGael) sraith a dhéanann iniúchadh cruthaitheach ar luathlitríocht na nGael agus ar scéalta bunaidh na hÉireann.