Anseo thíos, tabharfaimid spléachadh gairid ar na leabhair nua a bheidh ar fáil i dtús na bliana 2026, leabhair le hAilbhe Ni Ghearbhuigh, Brian Ó Conchubhair, Máirtín Coilféir agus Darach Ó Scolaí ina measc.
Liadain agus Cuirithir
I mí an Mhárta tá súil le Liadain, leagan úrnua den seanscéal grá faoi bhanfhile na meánaoise agus a leannán file arna chumadh ag banfhile ár linne féin. Pictiúrleabhar álainn maisithe ag an ealaíontóir Corcaíoch, Chrissie Dervin.
Sean-Dearc le Seán Mac Mathúna
Tá an scéal gearr nó nóibhille Sean-Dearc leis an mórscríbhneoir a cailleadh ar an mallaibh, Seán Mac Mathúna, le foilsiú sna earrach. Scéal buile é, é diamhair agus mealltach, lán le léaspairtí agus grinnléargas an scríbhneora. Agus é maisithe go gleoite ag an ealaíontóir Aodh Mac Lochlainn.
An Soiscéal de réir Titley
Bailiúchán aistí atá sa gcéad leabhar eile, An Soiscéal de réir Titley a d’eascair as comhdháil a reachtáladh i nDeireadh Fómhair na bliana 2018 chun aird a tharraingt ar ghradam agus ar thábhacht idirnáisiúnta an mhórscríbhneora, Alan Titley. Pléann údair na n-aistí réimse ríleathan de scríbhinní Titley, óna chéad ‘mhacghníomhartha pinn,’ mar a dúirt Gearóid Denvir, go dtí an saothar ba dheireanaí leis.
Is é an Dr Máirtín Coilféir an fear eagair agus ar na húdair tá Aifric Mac Aodha, Máire Ní Annracháin, Máirín Nic Eoin, agus Seosamh Ó Murchú.
Eoghan Béal
Tá scéal Eoghain Bhéil ar cheann de na scéalta móra is lú eolais orthu sa Ghaeilge. Bunaithe ar an seanscéal Caithréim Cheallaigh, insítear scéal an rí a a d’ordaigh agus é ar leaba a bháis, gan é a chur sa reilig “ach cuirtear anseo mé ar thaobh an rátha,” ar sé, “agus mé i mo sheasamh sa gcré, m’aghaidh leis an tuaisceart agam, agus mo gha dearg i mo dheasláimh.”
Is ann atá cur síos ar mhallacht Chiaráin Chluain Mhic Nóis, ar an drochmharú a tugadh ar Cheallach Easpag, ar chasadh agus ar mharú na gCeithre Mhaol, agus ar an mbáire fola ag bainis Mhuirígh mhic Eoghain. É sin agus go leor eile.
Is é an t-ealaíontóir Alé Mercado (Sadhbh) a mhaisigh an pictiúrleabhar gleoite seo.
An Saol Bocht
Leabhar tábhachtach ar shaothar Bhriain Uí Nualláin atá sa leabhar seo, leabhar a thugann faoina bhfuil scríofa faoin Nuallánach a scrúdú agus a iniúchadh as an nua, agus a chuireann leis sin eolas úr atá tagtha chun solais ó scríobhadh na beathaisnéisí agus na saothar taighde eile faoi.
I dtús na bliana cuirfear athchló ar thrí leabhar a bhfuil an-tóir orthu, Bódléar le Darach Ó Scolaí, agus I dTír Strainséartha agus Bealach na Spáinneach le Liam Mac Cóil.