Te sna sála ar an gcéad leabhar sa tsraith, Deirdre, tá Bláthnaid tagtha ar an bhfód. Tá scéal Bhláthnaide ar cheann de scéalta móra na Rúraíochta. Is ann atá cur síos ar an rí agus ard-asarlaí, Cú Raoi, agus ar an gcaoi ar fhuadaigh sé Bláthnaid, iníon álainn rí Mhanann, go dtí a dhún féin, Cathair Con Raoi i gCiarraí.
Tragóid Mhór na Rúraíochta
Ach níorbh é Cú Raoi amháin a leag súil uirthi. Shantaigh Cú Chulainn freisin í agus is mar gheall ar ghrá na beirte di a bhí sé ina bháire fola idir Muimhnigh agus Ultaigh ar shleasa Shliabh Mis. Go deimhin, tá sé sa seanchas fós i gCiarraí gur dhoirt Bláthnaid bainne in abhainn na Fionnghlaise mar chomhartha do Chú Chulainn agus na hUltaigh go raibh Cú Raoi ina chodladh gan chosaint sa dún.
Bláthnaid agus an Táin
Iníon le Meann, Rí Mhanann, ab ea Bláthnaid, agus ba le Clanna Deadhadh, de shliocht na nÉireann (Iverni), a bhain Cú Raoi mac Dáire. Treibh a bhí iontu siúd a d’fhág a n-ainm ar an tír agus a rian ar Chúige Mumhan, ach go háirithe. Sa mhórscéal Táin Bó Cuailnge, ghlac Cú Raoi páirt i slógadh Mhéibhe is Ailealla in aghaidh na nUltach, agus sna tráchtais ghinealaigh, léirítear a ghaol leis an ardrí Conaire Mór.
Ealaín Anastasia Melnykova
Áirítear an seanscéal Oidhe Chú Raoi mhic Dáire (Aided Conrói maic Dáiri) ar mhórscéalta na Rúraíochta. Sna lámhscríbhinní Leabhar Buí Leacáin (a scríobhadh thart ar an mbliain 1400) agus Egerton 88 (a scríobhadh sa 16ú haois) atá an dá leagan is sine den scéal, agus tá leaganacha eile de ar fáil i Laud 610 agus i bhForas Feasa an Chéitinnigh.
Is ar na leaganacha sin a bhunaigh Darach Ó Scolaí an leagan nua seo. Is í Anastasia Melnykova a rinne an obair álainn ealaíne.