Ó thús na staire, tá sé aitheanta gur gléas cumhachtach cumarsáide an óráid phoiblí. Bíonn feidhm le briathra a deirtear os comhair slua — le daoine a ghríosú chun gnímh, leis an éagóir a chur ina ceart, le cath a chur ar an tíoránacht, leis an ngrá a chraobhscaoileadh, le misneach a chur ar dhaoine a bhfuil cruatan rompu, le tuairimí nua a nochtadh nó le heolas a thabhairt. Bíonn feidhm níos suaraí leo freisin — le holc agus bréaga a scaipeadh, leis an dubh a chur ina gheal, le paisin fhuafara a chorraí. Cén t-iontas go raibh an óráidíocht ar na healaíona is mó meas sa domhan clasaiceach agus go ndúirt Cicearó nach raibh rud ar bith chomh dochreidte sin nárbh fhéidir a dhéanamh inghlactha le hóráidíocht?

Ó Mhaois go Roosevelt

Sa chnuasach seo, tá os cionn leathchéad óráid ar fad, óráidí a tugadh ó aimsir Mhaois anuas go dtí Éire na linne seo. Tá idir mhór-óráidí ann — ó leithéidí ó leithéidí Pheiricléas, Abraham Lincoln, an Phiarsaigh, Éamon de Valera, Franklin D. Roosevelt — agus óráidí nach bhfuil a gclú chomh mór sin ach a thugann léargas eile dúinn ar an saol agus ar an stair. Ní miste a lua, freisin, in éindí le gach uile cheann de na hóráidí, go bhfuil cur síor ar chúlra na hóráide a chuireannn an chaint ina comhthéacs féin.

Seo í an dara leabhar ó Chló Lováin, inphrionta de chuid Leabhar Breac atá bunaithe thart ar émigrés na hÉireann sa Bhruiséil. Anuraidh, foilsíodh aistriúchán le Colmcille Ó Monacháin ar John Steinbeck, Ar Luch agus ar Dhuine, leabhar a ghnóthaigh Gradam de Bhaldraithe i mbliana. Agus, leis seo, an dara leabhar, tá an t-inphrionta faoi lán an tseoil ag muintir Lováin.

Ní Ghabhfaidh siad Tharainn!

Mar a deir an t-eagarthóir, Aibhistín Ó Duibh, i réamhrá an leabhair, ‘Is iomaí ráiteas iomráiteach as óráid atá tagtha anall chugainn ón am atá caite, cuir i gcás ‘Ní bheidh Éire, in uireasa na saoirse, go brách ar suaimhneas’, ‘Ní ghabhfaidh siad tharainn’, ‘Ba sin an uair ba bhreátha iad’; is cúis sásaimh dom roinnt díobh sin a chur ar fáil anseo in éindí a chéile agus tá súil agam, ní amháin go mbeidh an leabhar seo ina áis fhónta tagartha ag lucht labhartha na Gaeilge agus ráiteas den sórt sin á lorg acu, ach gur lón léitheoireachta taitneamhach a bheidh acu ann freisin.’ Agus ní beag sin.

Leabhar Breac
Privacy Overview

This website uses cookies so that we can provide you with the best user experience possible. Cookie information is stored in your browser and performs functions such as recognising you when you return to our website and helping our team to understand which sections of the website you find most interesting and useful.